Na Mapuli Misalaba,
Shinyanga
Taasisi ya kuzuia na
Kupambana na Rushwa TAKUKURU Mkoa wa Shinyanga kwa kushirikiana na TARURA
imeendelea kuwabana wakandarasi wanaotekeleza miradi chini ya kiwango.
Hayo yamebainishwa leo
Alhamis Agosti 24,2023 na kaimu Mkuu wa TAKUKURU Mkoa wa Shinyanga Bi. Mwamba
Masanja wakati akitoa taarifa ya utekelezaji kazi ya robo ya Nne ya Mwaka wa
fedha 2022/2023.
Amesema taasisi hiyo
ilibaini ucheleweshaji wa ukamilishaji wa miradi ukiwemo mkataba namba AE/001/2022/2023/SHY/W/16
unaohusisha matengenezo ya mara kwa
mara, matengenezo ya kawaida na uboreshaji wa vipande vya barabara
unaotekelezwa katika kata ya Chamaguha, Ngokolo, Ndembezi, Kambarage na Mwasele
chini ya usimamizi wa TARURA Wilaya ya Shinyanga.
“Tulibaini
ucheleweshaji wa ukamilishaji wa mradi mkataba Na. AE/001/2022 – 2023/ SHY/W/16
wa matengenezo ya mara kwa mara (Periodic Maintenance), matengenezo ya kawaida
(routine maintenance) na uboreshaji wa vipande vya barabara (Spot improvement)
unaotekelezwa katika kata ya Chamaguha, Ngokolo, Ndembezi, Kambarage na Mwasele
chini ya usimamizi wa TARURA Wilaya ya Shinyanga wenye thamani ya Shilingi
milioni 236,606,000.00/=”
“Mradi
huo unahusisha kazi kuu za uchongaji wa barabara, kuweka vifusi na kushindilia
na kuchonga mitaro mradi ulitakiwa kukamilika 27.4.2023 lakini haukukamilika kwa wakati mbali ya
mkandarasi kuongezewa muda wa ziada wa siku 75 kuanzia tarehe 28/04/2023 hadi
12/07/2023 kukamilisha kazi hiyo, hivyo kwa sasa mkandarasi huyo kwenye kipindi
cha makato ya fedha ikiwa ni adhabu ya kuchelewesha mradi kwa mujibu wa
mkataba.”amesema Mwamba Masanja
“Mbali
na ucheleweshaji wa ukamilishaji wa mradi mkandarasi aliyekuwa akitekeleza
mradi huo ni Brampem Global Investment. Co. L. T. D wa Shinyanga, ametekeleza
kazi ya mradi chini ya kiwango kinyume na standard specification of Roads Works
– 2000 ambayo ni sehemu ya mkataba wa kazi husika”.
“Baadhi
ya mapungufu katika matengenezo ya
barabara nikutokuchonga barabara kwa usahihi, kina cha tabaka la kifusi
kinachowekwa kitofikia kiwango kinachotakiwa
na kutosindiliwa ipasavyo na uchongaji wa mitaro ya pembezoni mwa
barabara isiyoridhisha”.amesema Mwamba Masanja
“TAKUKURU
ilimshauri msimamizi wa mradi ambaye ni TARURA imtake mkandarasi arudie kazi
zote alizotekeleza chini ya kiwango ili thamani ya fedha iweze kuonekana”.amesema
Mwamba Masanja
Ameitaja miradi mingine
iliyofuatiliwa kwa inahusisha sekta mbalimbali ikiwemo elimu ambapo amesema
jumla ya miradi 17 yenye thamani ya shilingi bilioni 5.6 imefuatiliwa.
“Tumefuatilia
miradi mingine ya maendeleo katika sekta ya elimu, afya, maji, kilimo na ujenzi
ambapo jumla ya miradi ya maendeleo 17 inayotekelezwa yenye thamani ya shilingi
bilioni 5.7(5,601,349,020/=) imefuatilia. Dosari ndogo ndogo zilibainika kwenye
miradi miwili na ushauri ulitolewa wa kutatua dosari hizo”.amesema
Mwamba Masanja
Katika kipindi hicho
TAKUKURU Mkoa wa Shinyanga ilipokea taarifa 35 za malalamiko ambapo 26 kati
yake zinahusu rushwa huku taarifa tisa hazihusiani na rushwa na kwamba
uchunguzi wake unaendelea.
Kaimu mkuu wa TAKUKURU
Mkoa wa Shinyanga Bi. Mwamba Masanja amesema katika kipindi hiki kesi 11
zinaendelea mahakamani ambapo kesi mpya ni tatu na kati ya hizo kesi mbili
ziliamuliwa na jamhuri ilishinda huku akitoa wito kwa wakazi wa Mkoa wa
Shinyanga kuendelea kutoa ushirikiano kwa serikali ili kuhakikisha miradi yote
inayoendelea kutekelezwa inakamilika kwa ubora.
“Kwa mwananchi yoyote atakayeona vitendo
vinavyoashiria ubadhilifu wa fedha za miradi atoe taarifa TAKUKURU kwa kufiki
ofisi zetu zilizopo mtaa wa uzunguni mkabala na nyumba za bodo ya pamba au piga
simu namba 0738150196 au 0738150197, ofisi ya Kahama simu 0738150198 na ofisi
ya Kishapu simu 0738150199 au piga simu bure 113”.
Aidha kaimu mkuu wa
TAKUKURU amesema ofisi hiyo imeendelea kushirikiana na wadau mbalimbali
kuhakikisha elimu ya masuala ya rushwa inatolewa katika taasisi za serikali,
binafsi na kwa wananchi kwa lengo la kuongeza wigo wa mapambano dhidi ya
rushwa, ambapo pia amesema njia mbalimbali zimetumika kuelimisha kwa kipindi
hicho ikiwemo uelimishaji wa klabu za wapinga rushwa 22, mikutano ya hadhara 5,
semina 7 na vipindi vya Redio 4.
Pia amesema ofisi hiyo
inaendelea kutekeleza program ya TAKUKURU RAFIKI ambapo ameeleza kufanyika kwa
vikao vya utambuzi wa kero katika kata kumi na moja ambazo ni kata ya
Pandagichiza, Lyabusalu, Ndembezi, Bulige, Ukenyenge, Shagihilu, Bunambiyu,
Igaga, Busagi, Bugarama pamoja na kata
ya Mjini Shinyanga.
Katika hatua nyingine
TAKUKURU Mkoa wa Shinyanga imejiwekea mikakati mbalimbali ya utendaji kazi kwa
kipindi cha mwezi Julai hadi Septemba 2023 ikiwemo kufanya vikao vya kurudisha
marejesho kwa wananchi kuhusu kero zilizopata majibu kutoka kwa wadau na watoa
huduma ili kukabili au kuzuia rushwa katika utoaji wa huduma kwa jamii na
utekelezaji wa miradi ya maendeleo.
